I have no doubt that it is possible to give a new direction to technological development, a direction that shall lead it back to the real needs of man, and that also means: to the actual size of man. Man is small, therefore, small is beautiful. To go for giantism is to go for self-destruction.
-FRIEDRICH E. SCHUMACHER
देखेर झलमल्ल आकाश
धेरैबेर बिर्सिएछु आफैलाई।
•
लुगा धुँदै थिएँ-
सम्झना आयो
पुराना साथीहरूको।
•
समय त लाग्छ नै
हिरोसिमा मन
फेरि हरियै हुन।
•
खिर्कीबाट कसैले चिहाइरहेको छ
तुरुन्तै हेरें-
जवाकुसुमको बोट पो!
•
फर्किरहेका छन्
बेलुकी भैंसीहरू
एउटाको घुम्रिएको सीङमा
कुन्नि के को त्यान्द्रो।
•
उनीहरू मलाई झुकेर हिँडेको हेर्न खोज्छन्
मेरो कसुर यति नै-
झुकेर हिँड्न चाहिनँ।
•
हतारले खेद्छ
चितासम्म:
हतार-हतार बल्छ
चिता पनि!
•
सब थोक गुमाएर बाँचेकाहरू
-यहाँसम्म कि
जीवन पनि।
•
ए दवाइको रित्तो सिसी!
तिमीलाई धन्यवादसम्म भनेन नि
निको हुने मान्छेले?
•
राम्रो बजाउँथ्यो गिटार।
फेल कहिल्यै भएन स्कूलमा। केश पाल्यो।
परम्परालाई हाँक दिँदै कान छेंड्यो।
थुक्थ्यो लङ्की लगाउनेहरूको जमातलाई।
रमेश ड्रग्स खाने भयो।
•
आँसुमा पनि मौन।
हाँसोमा पनि मौन।
यति सोधिन्छ तर
-जाती नै?
•
सङ्कटको बादलले
डम्म छोपिएको देशलाई
खबरकागजमा बोकेर उनी
सुरुसुरु घर फर्किएका छन्।
•
कति माया गरेर स्याहार्छ जङ्गलले
कुनै घाम जित्न तपस्यारत
गुरिल्लाहरूलाई।
•
खिसी गर्नोस्
कृपया खिसी गर्नोस्-
म पनि त मान्छे न हुँ!
•
विचरा भङेराहरू
के ओढेर सुते होलान्
यस्तो जाडो रात?
•
ओ जून
पूरै नाङ्गिँदा पनि
घाम त कहाँ हुनसक्यौ र?
•
ताराहरू जन्मन्छन्
ताराहरू मर्छन्
ताराहरू चम्कन्छन्
ताराहरू अरूको जरा काट्दैनन्।
•
मान्छे, सुन्यौ
झाँगिएछ तिमीभित्र
साँघुरोको बोट।
•
गर्ज्यो
गर्ज्यो
गर्ज्यो बाघ-
म्याऽऽऽऽऽऽऽऽऽऽऽऽऽउँ
•
उज्यालोको कश तानेर
तिमी भन्छौ-
उज्यालो सकियो
हेर उज्यालो त फेरि निस्किरहेछ
धुँवा भएर तिम्रै नाकबाट...
•
मज्जको ह्याण्डराइटिङ्गमा
लेखिएको छ कथा
गज्याङगुजुङ जिन्दगीको
-हेर्नुहुने महाशया?
•
धुलो
अरू के?
•
म अन्धोलाई
मेरा आँखाका औंलीले
तिम्रा आँखाका ब्रेल छाम्न देऊ।
म अन्धोलाई पनि
यो संसार हेर्न देऊ।
•
कत्रो भो हँ चेखव महोदय
समय चोरेर राति
बाजेलाई दुखेसो लेखिपठाउने
त्यो फुच्चे भान्का?
•
पृथिवी बोक्ने हर्क्युलस
बिहानदेखि उभेको छ-छ
बोकेर भुल्डुङ
मट्टीतेलको क्युमा।
•
उनको हाँसोको वालेटमा
मुश्किलैले होलान्
दुइ-एक सक्कली पैसा।
•
यहीँसम्म थिएछ
घामले कुद्नु
रिले रेसमा
अब पालो जूनको।
•
तोड
पर्खाल तोड
पल्लोपट्टि पनि
एउटा संसार छ।
•
कुवाबाट हिजो
उघाएछु कविता
पानीसँगै।
•
आकाशमा झुण्डिएको
त्यो सेतो डम्फू
कसले बजाउँछ हँ?
•
मान्छेले झैं घाम ताप्दै
हाइकुको फूलमाथि बसेर बात मार्छन्
उपरखुट्टी लगाएका कीराहरू।
•
टोलाउँदै बसिरहेको बेला
अत्तालिँदै आइपुगेछ साथी।
•
संवेदनको बाटो
खोज्दै बोधन।
भिक्षु छु।
भिक्षु रहन्छु।
•
एकाबिहानै गाँउ पस्छ
लङ्गडाउँदै
फेरि एउटा गिर्खा दिन।
•
कसैले रोक्न नसकेको-
उनीहरू
गाइरहेकै छन्
आफ्नो गीत।
•
झुल्कियो उ फेरि।
•
डुब्छ रातो घामसँगै महानन्दामा
साँझ एउटा सिलगढी।
र बिस्तार टाउको निकाल्छ
पानीमाथि एउटा अर्को सिलगढी।
•
लामो-लामो सास तान्दै
कुइनेटोमा उभिएको बेला
उकालै हेरिपठाउनू एकपल्ट
बाटो बल्ल शुरु छ है!
•
झमझम बर्खा-
कति मीठो कविता कथ्दैछन् माटोमा
सखारैदेखि हलो जोतिरहेका खेताला दाजु।
•
उनले भने-
उदास लाग्छ यहाँको साँझ।
घरहरू, रूखहरू, ढुङ्गाहरू
साँच्चै उदास थिए सब थोक यहाँ।
•
चियाबारीको जीउडाल हेरेर
रमाउने पराइ आँखाहरूलाई
के वास्ता र
चियाबारीको भोकसित। शोकसित।
•
मरेका त छैनौं
माने नि
तर के जिउँदो यसरी नै भइन्छ?
•
फ्याक्ट्रीमा ओभरटाइम खटेर
ढिलो घर फर्केका बाबुलाई
"के ल्याइदिनुभो बाबा?"
भन्न नपाई निदाई बुनु।
•
बलियो ठानिएको त्यो रूखको जरा पनि
कति बलियो छ-
जान्नलाई हेर्नु
कुनै आँधीमा त्यो रूखलाई।
•
रुधिर फर्कन पनि सक्छ भन्ने आशामा
दैलो ढप्काए पनि
चुक्कुल चाहिँ मारिन राधिकाले।
•
अनिदो गाँउ
आज पनि अनिदो नै पस्यो जङ्गल।
रेड गरेका-गरेकै छन्
सरकारका कुकुरहरू।
•
लास्ट ट्रिप-
हत्तुहैरान कण्डक्टर दाइले
मुस्कुराउँदा पनि बल लगाए।